港燦自述 (存錄)

溯洄從之

2.
肥力你讚壞小燦啦

首先好多謝肥力你響歌德 個邊咁講 -

" 反而我又覺得，港燦有佢o既立場，但係又唔會先橫掃對手，咁樣我比較鍾意。"


- 若小燦無理解錯，"先橫掃對手" 是否指 "先挫底各方與自己立場不同者的觀點" ？ if yes，小燦好老實同肥力講，因為

[1] 我無乜辯才，亦唔係好辯之人。

[2] 十分感激任何街坊肯指正小燦各篇文章中在邏輯 / 思路上的誤區，或補充一些小燦未查証過的資料。

[3] 如果同一件事所有 bloggers 只有一種意見，或角度，這個社會十分危險。

[4] 小燦通常在整天工作 / 與股海搏鬥至筋疲力竭，思路最唔清晰時才寫同睇 blog。將寫同睇 blog 視為一種 mind relaxation，小燦的文章又點會有紋有路 ？

[5]
經過多年 study packs + past papers + 日常工作有大量標準 workpapers 和 checklists
的操練，我個腦除左勉強應付考試同填 checklists 之外再冇乜野可以處理到 - 但呢個亦係小燦 keep 住寫野 [或到處寫 d 無聊既
comments] 之原因，因我想試下 tune 番個腦去思考 exams 同填 checklists 以外既野。


-
對大部分時事、財經新聞等，小燦其實冇立場，有既已寫曬出來，又或者早有其他人寫左。"立場"
係指小燦睇某題目的角度。例如將來港示威的南韓農民，政府同傳媒會直接 / 間接令街坊們覺得呢班友生人勿近，個個帶定火水鐵枝黎搞事咁；各 NGO
同獨立媒體則力圖令大眾了解佢地如何被歐美國家的農產品補貼、開放市場等壓逼下，生活如何淒慘。小燦就會問，南韓政府當初加入 WTO
的理據為何、加入前有無考慮過國內農民會搞到今日既田地、加入後南韓人民是否真係買米平左選擇又多左、對受 市場開放後

影響既農民提供過乜野支援 ？ 南韓人民加入 WTO 後的整體得益是否遠高於南韓農民所受之損害 ？ 之後會再問，日本有無外國進口米賣 ？
日本有無入 WTO ? 如果無，日本生活費出名貴是否因為佢無入 WTO ? 但問完大堆問題後，小燦未必去自己找答案喔 [ 因為懶
]。只係，若有人問我點睇南韓農民，我就會問以上問題。


- 小燦多數寫社會時事，因為

[1] 個人生活極枯燥乏味 ;

[2] 因多年儲子彈交學費及作投機 / 資本金，盡量樽節消費，加上縮骨孤寒，有自閉傾向，日常生活只有街坊、同事、網友，冇朋友 ;

[3] 寫財經新聞，一: 孔少林同 方卓如 寫得遠比小燦好； 二: 此類分析背後所須資料考証功夫遠比狗 up 時事多，騰不出時間 ； 三: 部分 technical issues [ 例如相關 listing rules ] 自己唔係咁熟；四: 自己的投機 / 資眼光既非次次準，但又無法預知邊次唔準 ; 五: 無投資顧問牌 ; 六: 見得太多人比貼士街坊後，贏錢既見到面多謝無句，輸錢就立即來興師問罪，無謂累人，故費事寫。


- 小燦對社會其實十分冷漠。我咁大個人未參加過一次集會遊行，更無搞過 NGO，幫公公婆婆申請換公屋單位，陪佢睇醫生及裝平安鐘，亦無幫過任何人助選，搞 一針二渠三宴 舊衣回收等。唯一叫做 "公民參與" 的活動，就是每次有立法 / 區議會投票都一定去投，其餘所謂 "關心社會" 的舉動，只係得閒無聊上黎狗 up 一輪廢話後 fullstop 而已，層次比 "旁觀者" (bystanders) 更 cheap。做得 bystanders 的至少熟讀文史哲、小燦連老本行既都未讀好，更唔好同我講乜野知識份子的責任了。


- 小燦的 "立場" 係點建立起來 ？ 不如講講我點睇新聞，同睇乜野多，咁你大約會估到小燦對各種時事的立場 :

[1]
幾忙都好，都找份信報先刨孔少林同方卓如兩個欄。若唔響香港，都要睇睇方卓如個 blog，[ 孔少林要用 wisers
至睇到，所以響內地睇唔到，除非將來信報的網上版冇被內地封鎖 ] -
他們對財經新聞的分析方法，小燦覺得很值得學，所以幾忙都要睇。除信報外，若好得閒會睇金融時報，或內地既財經報紙。平時響香港只係 "聽報紙" [
聽香港電台晨早新聞後的報章摘要 ] 同 "睇" 新聞，即係睇報 MC6 直播既係趙海珠同郭詠琴，無理會佢地講乜。

[2]
可以騰出半粒鐘時間，除孔和方君之外，會睇埋信報社論、狄高同佢左邊 [ 即馬家輝、黃世澤、莫乃光等輪流寫既專欄 ] 關於 IT
新聞既分析及林行止。老曹就好快 skim 一次，睇下有無 d
新出台既中國經濟數據同政策法規分析。再有時間看看孔在齊、毛尖同龐寶林，或留意練乙錚有無忽然登幾篇文上來。成份信報只係睇咁多。以前亦會睇余錦賢，但
換左人後睇明報李先知同 tungpo 個 blog 好過。

[3] 再多 15 - 30 分鐘剩，會睇埋小燦左邊那堆常去的 blog。唔好意思，小燦慣用 bloglines

先看一遍。如對某些題目特別有興趣，或有相睇，有聲帶 / 歌聽；會馬上開多個 window 睇番原來的 blog，因為相關的 comments
以至旁邊的 shoutbox 留言多數一樣咁精采，錯過了絕對是遺憾。如果是以從業員角度睇該行業問題的文章，例如早排 星屑醫生講醫療融資、tungpo 講論資排輩、rm501 講如何量度噪音、florence 講佢採訪所遇見既騎呢人、miss lee 講佢如何與家長角力 等，小燦會睇多幾次，部分更開個 wordpad save 起佢。小燦連結某個 blog 只有一個標準 : 儘管佢有時寫 d 野我未必同意 / 睇得明，總之佢個 blog d 文令小燦有興趣由第一篇到最新一篇至少睇一次才肯罷休的，就 link 佢。

[4] 如果在 library 偷得半日閒，小燦再會睇下霸唔霸到呢幾份報紙同雜誌睇 : 生果報近月新開的政治八卦欄 [例如 "倔頭進士" ] 及張五常、左丁山個 column；明報 "李先知" ; FT 阿 Lex 及有 "city critics club" 的 "號外"。

[5] 放長假會睇兩本內地財經雜誌 : "新財富" 同 "財經"。
前者強項乃分析行業數據 [ 例如呢期 05 年 12 月號分析左 5 間香港上市既內地房地產公司，從中找出相對最好的地皮 : 在建工程 :
長期投資物業 : 短期待售物業在資產負債表的比例，香港重未見有証券研究部做過類似 study
]；後者長於分析國家最新經濟政策之利與弊，水準比大部分香港傳媒有過之而無不及。呢兩本雜誌若上 "尚書房" 買，都係 14 蚊本。

[6] 周日會睇睇 沈旭暉 同 李學斌 寫的新文章。好老實講，以小燦既水平，佢地寫既文，唔係每篇都睇得明，但佢地寫既係少數能夠從現象看本質的評論。

[7] 同以前好唔同，股票同指數少玩左，冇乜花時間睇。以前就倒轉，每日只睇 經濟通財經新聞。05 年 10 月時單是港交所主板已有 915

隻股票掛牌，一個普通市民就算 full-time 炒股都無時間睇得曬。通常認真玩股的街坊都係用電腦程式同私家報價睇圖軟件幫手 scan
出來。例如有人用程式，先 scan 每日收市後的 top 80 升幅股票，screen 成交股數比上日多 3 倍或以上 + 股價上升 15%
以下的，再看圖揀，據聞呢個方法唔錯。亦有睇是日業績公佈表，抄低業績有改善，或 / 又有息派的公司，再自建 database 跟進。如果你每日能
keep 住咁紀錄，養成習慣，一年後全港有邊幾間具備派息 + 盈利能力的公司 [ 我估而家頂多 300 隻 ] 及它們每年大約在何時公佈中 /
末期業績，你會開始不須開電腦也隨時每個行業寫到 2-3 隻出來。若能做到，你就有機會比 david webb 早一步掘到佢 05 年 christmas pick : 富士高 [927]，先賺左佢公佈後翌日該股的 13.5% 升幅。重有 d 更勤力既街坊，會每日掃一次 最近 3 個月上市新股 既圖，食埋今年既新股熱。

Sat, Dec 10, 2005 14:22