posts | comments | archives | links | create | song
(reminder: all quotes here are fiddled, probably.)

警察


坊間傳聞

以下內容係朋友叫我轉載,大家自己判斷啦

我係71當日有份係遮打道企天光,好多人口中嘅「警犬」。今次我唔係想話叫你地要體諒我地,而只係想講我睇到嘅事。

今次71真係搞到天光先清到場,我知嘅,我可以講嘅原因有三個:

1 )因為遮打道唔同政總,兩邊都係行人路,我地唔可以亂叫d「行人」離開,亦因為咁,好多人睇住我地做野

2) 今次d人真係郁都唔郁,有一d「本來會衝嘅人」(唔好問我講緊咩人咩鬼)都冇機會令現場混亂

3) 真係第一次做「佔中」,而且上頭壓力係超大,樣樣決定都步步為營,所以搞咁耐

至於其他唔講得嘅原因…第一,我係警察,有啲野講左就係二五仔,第二,我唔想講左而令到上頭第時連風都唔放,因為其實依家我地入面都有好大矛盾。

當初新阿一上位,其實真係人人開心,最少好多伙計都話有咩面子,行必對住老黑講野都大聲d。但耐左,其實好多人都明依個頂爺係點,最大問題係所有上頭都要跟頂爺作風,你唔跟你冇運行。

以前出一次特別更、搞示威,briefing同依家好唔同,以前都係就咁講崗位、提醒下、聯絡野,依家take brief就真係好似打仗咁,同埋下下都要做畀記者睇,個會氣氛好差,阿頭唔爆粗,我地都會爆晒粗,我心諗,其實唔係689咁d人都唔會出來啦,佢地又點會走出來行丫。

依家差館有幾種人,1)文職咩都唔理,唔想理;2)撐兄弟嘅;3)撐市民,但唔出聲。

咁有冇撐市民,但會出聲? 有,好少,多數都係果d老差骨,唔係唔埋堆就係根本升職無望果d。

樣樣我都講下啦,
1)文職咩都唔理,唔想理 -其實佢地就算唔理,但日日都係見到好多怨氣嘅差佬,其實佢地心底都係撐手足多。

2)依d最多,第一,你想當紮你就要埋堆,而我頭先都講過,差唔多所有上司都要行「鷹派」風格,佢地要擦依一對鞋,點可以唔撐?(上次政總打記者果個3柴我估冇畀人鬧,仲一定有好多手足撐)而且好簡單,依家考差佬嘅個個都係讀書唔成,上面講兩句就咩都信,再加上一堆男人個個都以為自己係「英雄本色」主角,講義氣拜關二哥(其實仲有大把係一齊賭馬叫雞,不過黑腳就少d)果d大學生入來嘅 自以為好醒,一來就高人幾班,但係其實同坐堂睇樓冇分別,仲要返工好多網都上唔到,要「教」佢地有幾難?仲有wor,facebook d警察page真係好多打手…我估架咋。

3)撐市民,但唔出聲 - 我都算係其中之一,冇得出聲架,一出聽就畀人屌,仲可能打小報告,我仲要見board,就算唔想紮,我都仲排緊宿舍,我學歷唔比毅進仔好,我辭左職,真係唔會搵得返一份薪高糧準有樓住嘅工,你話我仆街,係呀,你識隱形嘅入差館一轉丫,合埋眼齋聽聲,你都未必分到邊個係差人邊個係爛仔。


話返轉頭,我今次咁想講,其一係因為聽到立法會有人話要組民團幫警察,係好多人都支持,但今次真係有比較多聲音指話咁樣咪即係紅衛兵,仲要搶野做 ,我真係開始擔心

其二真係想提醒第時會出去衝嘅人,唉…我都唔知可以點講,我叫你地照衝,我就對唔住手足,我叫你地唔好衝,我又好撚肯定話你知你地齋坐我地就可以照拉,我地係現在9成人都已經入晒狀態,唔會因為你地叫,你地喊而動容,因為我做左幾年差佬,我可以好肯定話你知,人只要有權力,就可以成個人都變晒。

最後我想講兩樣野,

第一,如果你支持差佬,你試下去現場睇下咩叫「殺紅了眼」,你再諗下發事咩事。冇錯,我地平時係警察,除暴安良,但去到如政治有關,我地就只係冇靈魂嘅狗,可能會令你地好失望。不過你地都未必睇到,因為好多野我地都係用「冷處理」(即係拎架旅遊巴去晒太陽咁),你唔會明,亦唔會有位入。

第二,想同果1成仲知自己做緊咩嘅手足打下氣,其實我都唔知可以點做。

------

0 Comments:

coComment


:: Kommentar veröffentlichen
 (留言請留名, 謝!)


Links to this post:

:: Link erstellen

<< Home