對香港教育的牢騷

回貼留言, 並不是有甚麼高明論調, 只為留個紀錄, 原來自己曾經發過些如此牢騷也好.

在歌德處的留言 (2006-09-22香港教育):

今次我又唔係好服你的諷刺喎, 最少唔完全服得晒喎. 事關無論咩野好方案都好, 要行得通, 個徵結都係係個(1)師生比例, (2)每班人數個度, 同(3)文件報告工作 (即係宏觀調控的強度). 一班40人, N咁多班, 莫講話你咩野教學法同學校組織方法都行唔到, 就算係上心D跟下D學生都有心無力啦.

其實香港講緊的所謂小班, 都唔係話咩野小班啦, 要以而今教育經費不減不增的條件下來講, 最多減到30人左右, 已經執到.

所以, 我真係覺得, 係香港, 莫管它小班教學就(只)等於小D人一班, 總之都係個句: 美女厨房, 食左先講. 如果唔係教育經費一削左, 政府睬你都儍.

咁當然, 呢個講法的重心係, 如果都係估估下, 我會信D日日接觸同學的老師, 多過信D對住文件同數字的各式學者, 官員同咩野專業企劃及監督委員會囉. 咁D老師日日對住班同學, 總體來說再廢都摸到D心得. (廢到篤同頺到盡個D唔計丫). 學生小五個就係小五個, 真係有顯著差別架, 個班房都明顯靜D架. 最少有心做的老師, 都可以有心力可以做好D, 關心到多D同學差異.

換句話講, 即係話, 係教育呢個問題上, 我思疑打散來分判出去各師各法, 係好過麥當奴式控制下的大規模生產.

又又推多一重講, 我成日形住, 一個唔會養住懶人的制度, 係唔會有高人, 除非你有法子得到細緻全面又準確的資料. 高層直接而細緻的調控就係假設可以得到這樣的資料, 特別在科技的力量幫助下. 而我唔係好信會得, 如果不嚴重干擾/扭曲個系統的話.

咁當然, 如果專攻教育問題的議員, 對教育問題的認識來來去去都只係得小班兩個字, 即係同我呢D cheap雞水平的見識差唔多, 咁又真係水皮左D.