關於私人公眾等的歪理數則

1. 哲學家在《寫 Blog 隨想》裡說：

說 Blog不祇是日記，但像日記一樣，閣下貼出來的若不是當時當刻的感受，總有點自欺欺人的感覺．

那得看寫泊的目的。以敝泊為例，敝泊並不是用來發表的，只是個抽屜，把我已前寫過或者今天想到的東西丟進去，希望不會那麼容易不見了，又容易找出來重看（對於我這些沒系統的人，這個新科技真係好好用嫁）。好比在辦公桌上種些盆栽、擺些相，街坊行過，興之所致大家談兩句，也歡迎。既然

透過這些部落理論，我們可以更好地理解 Blog現象的生成和幻滅的過程，理解我們和它的關係．

那大概不必先把某些in practice的落泊理論看成無甚意義。

2. 言歸正傳, 在小踢《 香港的留言文化？（二）》處留了言. Kli囑咐我 "諗真少少". 咁, 諗真少少, 又真係幾歪理喎.

等我發下翕風先.

出去飲茶, 你同人搭枱, 咁, 你話張枱係私人定係公眾丫拿? 如果成張枱你坐晒, 你話張枱又係私人定公眾架? 咁樣問法好似好怪, 有D九唔搭八咁, 係咪? 因為私人和公眾呢兩個字在這樣的問法下, 其實有專門用法, 背後附著一大套理論. 簡單講, (1) 個人VS政府. 就係政府/阿公應唔應該管到. 政府唔應該管個D地方/事情/範疇就叫私人, 政府應該管個D地方就叫公眾. (2) 私有產權. 有人有對佢有產權的就叫私人, 無人可以話自己對佢有產權就叫公眾.

咁, 想講既係, 私人公眾係D好technical好專門既野, 如果在既唔係講緊個人同政府關係, 又講唔清楚咩叫產權的清況下, 講私人公眾係無咩意思既. (咬文嚼字既野, 留番比D專門的律師做啦). 往往只不過等於話, 呢到D規矩係邊個話事. 而且往往背地裡, 仲要係 暗示邊個 話晒事. “話晒事” 喎, 想唔永無寧日都唔得啦.

須知道係好多場合下, 私人公眾只是心中那堆規矩的”代名詞”, 根本不是因為所以的關係. 所以實際D, 無謂講仔細斟酌咩野私人公眾勒, 咁, 不如直接把那些規矩一條條拿出來, 大家講下, 係相關的目的之下, 點先至合情合理好過啦.

好, 諗真少少………………..
個人唔想政府/阿公管個D野, 就會將佢講成係私人. 想政府管個D就講成係公眾. 倒過來政府唔想理個D就會話佢係私人既. 想理個D就會話係公眾既. 所以, 講公眾的範圍就即係變相講政府的職權範圍, 政府應該/可以插手的範圍. 咁講會唔會清楚D?

(所以我話私人公眾呢D法律觀念, 不如留番比D律師咬文嚼字勒.)

其實你係咪想話, 我只講左(1),(2), 重有D更關鍵更核心的用法無講呀? 比如話, 私人網絡, 私人銀行服務等等.

我好似離晒題添.

3. 在小踢《耐人尋味》的留言:

唔使咁寸寸貢既. 有時D野搞到麻鬼煩, 係因為語氣多過內容既. 好聲好氣D會容易聽得入耳D. (我知我知, 你而家想扼死我呢個牆頭草丫麻)

拿, 我真係覺得 blog-you的兩位搞手, 真係功德無量嫁. 人地出雞仲出埋鼓油. 好比開P, 個場主唔止出個場仲出埋音樂出埋酒水, 出錢出力出時間. 我地坐享其成. 真係應該心存感激.

代唔代表香港泊友, 呢D野係口碑, 唔係話自己話自己係唔係, 或者認唔既. 咁, 我諗大家都覺得hkbloggers都幾代表香港泊友嫁. 個九百幾人去hkbloggers到掛單 (無論聯唔聯播), 你估講笑呀, 人人多多少少 (其實唔少) 係有D認同感既. 所以呢, 對hkblogger係有D期許, 同埋多多少少將佢看成係呢九百幾人 “組成” 的香港泊友群體文化的表現/象徵. 所以講還講, 君子動口不動手, Admin把尚方寶劍真係要用得好慎重嫁, 幾乎唔到遇上掃場大捣蛋, 一面倒到非出殺手鐧不可都唔用嫁. 因為佢代表無上權力, 一用, 好多本來心照不宣的規矩/默契/期望/幻想/憧景/自由自在感/etc., 都會忽然覺得危危乎, 簡直就好似宣布動員勘亂時期咁, 所有人就有D陰影, 散散地咁嫁勒.

(係嫁, D留言回貼時改左幾隻字嫁.)

咁, 我又真係好欣賞兩位Admin的貢獻嫁.