粵謳．別意

想必緣分已盡，花債都還齊。
債還緣盡，故此惹出別慘離悽。
唉，我兩個係咁情痴，點估話情不到底，
想起從前箇種風月哩，好似夢斷魂迷。
記得起首共你相交，你妹（我）年紀尚細，
箇陣傾談心事，怕聽海上鳴雞。
只望相與日子咁長，你亦會同妹設計。
點想你夫妻情重，不肯帶賤妾回歸，
累得我斷梗又好似飄蓬，無所倚繫。
想到話飄流無定咯，只著要搵的挨依。
今日人地話我薄情，唔係都似係。
再不估同群咁多姊妹，無個知我心上咁難為。
我近日面上桃花，只係憑眼淚洗。
唉，君呀，你唔好為我屓屭，
知道拗硬箇副心腸唔多願，
所以你自從聽見話我要去咯，此後你總不開嚟。

（「別意」，收於招子庸《粵謳》）

* * *

料也料不到粵謳這部書竟給我在圖書館裡碰到，真是神推鬼擁，馬上抄下一段來樂一下。